交陪

日子是用螺絲絞咧交陪

每工按透早開始

我將一粒一粒的螺絲拆落來

閣甲一粒一粒螺絲鎖轉去

面帶笑容將修理好的家電交予客戶

交陪一、兩張紙鈔

共一个和善的面容

歇睏的時陣，泡一壺茶

鼻著茶米的清香

啉著茶米的喉韻

這時就會清醒早起的恍神

恢復流汗了後的忝頭

用茶米，我交陪了一睏仔美好的享受

暗時坐佇書桌前

當檯燈一光，日時的形影完全消失

我攑著一支筆

去追隨內心的感受

寫出過去的黑白

嘛寫出未來的色彩

寫出屬於家己的心情故事

我用一支筆，交陪著內心的世界